कार्यप्रकार

तापी पाटबंधारे विकास महामंडळाची स्थापना दिनांक 1 जानेवारी-1998 रोजी झालेली असून महामंडळाचे कार्यक्षेत्र तापी खोऱ्यातील जळगांव, धुळे नंदूरबार व नाशिक (अंशत:) या चार जिल्ह्यात येते.
सदर महामंडळ तापी नदी खोरे अभिकरण म्हणुनही कार्यरत आहे. नदी खोऱ्यातील सर्व बांधकामाधिन पाटबंधारे प्रकल्पांचे सर्वेक्षण, संकल्पन व बांधकाम करणे, बांधकाम पूर्ण झालेले प्रकल्प व्यवस्थापन विभागास वर्ग करुन त्यांचे देखभाल, दुरुस्ती व व्यवस्थापन करणे, सिंचन-बिगर सिंचन पाणीपट्टीची वसूली करुन शासनास महसुल जमा करुन देणे ही सर्व कामे महामंडळ नियमित तत्वावर करत आहे.
तापी नदीमधुन मोठ्या प्रमाणावर वाहुन जाणारे पुराचे पाणी अडवुन व उपसा करुन, साठवण तलावामध्ये साठवून, बंद नलिका प्रणालीद्वारे तसेच ठिबक सिंचनाद्वारे शेतीला पुरविण्याचे महत्वाकांक्षी प्रकल्प, तापी पाटबंधारे विकास महामंडळाने हाती घेतलेले आहेत.
नर्मदा नदीवरील सरदार सरोवर प्रकल्पामुळे बाधित होणाऱ्या आदिवासी भागातील गावांचे पुनर्वसन करण्याचे कामही तापी पाटबंधारे विकास महामंडळामार्फत करण्यात येत आहे.
तापी नदीच्या खोऱ्यामध्ये, भूजलाच्या वाढीसाठी “ महाकाय पुनर्भरण योजना ” ही महत्वाकांक्षी योजना तसेच गिरणा नदीवरील नविन तंत्रज्ञानाने बांधण्यात येणारे “ बलुन बंधारे ” या महामंडळाकडील वैशिष्ठ्यपूर्ण योजना आहेत.